Siç njofton gazeta Blic, Kosovari Ludovik Tunaj është i pari që ka bërë presidentin e UEFA-s, Michel Platini, të firmoset dhe të fotografohet me fanellën “FIFA forgot KOSOVO” të cilën e kishte shkruar vetë. Tunaj këtë gjest e pati bërë në mbrëmjen gala të FIFA-s për “Topin e artë” para dy vjetësh.Ai ishte mysafir i veçantë në këtë mbrëmje, pasi bashkëpunon me FIFA-n dhe prej atij rasti Platini gjithmonë mundohet ta shmangë Tunajn në gala mbrëmjet e “Topit të artë”, shkruan sot “Koha Ditore”.
Tunaj është njëri prej floktarëve më të njohur jo vetëm në Zvicër, por në mbarë botën. Ai është shumë i famshëm dhe ka klientë të njohur si nga bota e sportit ashtu edhe nga ajo e shoubizit.
“Unë jam krenar që jam shqiptar dhe me punën time dua t’i tregoj gjithë botës se kush janë shqiptarët. Edhe në mbrëmjet gala të FIFA-s gjithmonë prezantohem me krenari si shqiptar dhe të gjithëve u flas për Kosovën”, shprehet Tunaj. “Kam lidhje në gjithë botën dhe kudo që shkoj jam shumë i mirëpritur”.
Ai është me prejardhje nga fshati Sallagrazhdë i Komunës së Suharekës, kurse prej vitit 1986 jeton në Zvicër ku edhe e ka mësuar zanatin për floktar. Tunaj thotë se nuk kishte zgjidhje tjetër dhe tash nuk është pishman për shkak se ka bërë emër dhe famë në tërë botën…